Avaz.Biz xəbər verir ki, ABŞ Dövlət Departamenti cümə günü “X”də farsca istifadəçi hesabında İran hökumətinin Rusiya ilə hərbi əməkdaşlığını ört-basdır etmək cəhdi barədə məlumat açıqlanıb.
Ötən gün Ukrayna mətbuatı İranın “Puya” şirkətinə məxsus “İlyuşin 76” nəqliyyat təyyarəsinin Rusiyanın işğalı altında olan Krım yarımadasındakı Simferopol şəhərinin hava limanından havaya qalxdığını bildirib. “Puya” hava yolları şirkəti həmin xəbəri qətiyyətlə rədd etsə də, Vaşinqton bununla bağlı sübutların olduğunu vurğulayır.
“İran hökuməti Rusiya ilə münasibətləri barədə yalan danışmağa davam edir. BMT və ABŞ-nin sanksiyasına məruz qalan SEPAH-a bağlı “Puya” aviaşirkətinin işğal altındakı Krıma uçması şirkətin gülünc təkziblərinin yalan olduğunu sübuta yetirən açıq dəlildir”, - ABŞ Dövlət Departamentinin açıqlamasında deyilir.
Qeyd edək ki, Tehran və Moskva arasında münasibətlər, xüsusilə də hərbi sahədə əməkdaşlıq Rusiyanın son 18 ayda Ukraynaya hərbi hücumundan sonra xeyli dərinləşib.
Avaz.Biz
